“Бирдамлик” ҳаракати фаоли Анварбек
Русларда бир одат бор. Қийин вазият олдида ожиз қолишса, нима қилиш керак,- деб ўйлашади. Америкаликлар эса қийин вазият юзага келганда, нима қилмаслик керак, -деб фикр қилишади. Ўзбеклар эса қийин вазият қаршисида қолишса имкон қадар ўзига жуда хам яқин бўлган дўст-у биродаридан маслахат сўрашади ва шу билан бир қаторда руслар каби, нима қилишим керак, – деб ўйланиб, бош қашлашайди. Мен бу гаплар билан хурматли ўқувчиларнинг вақтни ўғирлаб, сўз ўйини қилмоқчи эмасман. Яқиндагина интернет оламида “саёхат” қилар эканман, “Ўз.А” расмий ахборот агентлигининг расмий сайти www.uza.uz га ҳам бир бора мўралаб кўрдим. Во ажаб, буни қарангки мамлакатимиз расмийлари юртимизда ўта хам қийин иқтисодий ва ижтимоий вазият юзага келган шу кунларда ахолига нима қилиш кераклиги хақида ўйламасдан, тинимсиз равишда шукрона айтишни маслаҳат бераётган экан.
Бунга ўқувчилар ҳам ишонч ҳосил қилиши учун Олим Тўрақулов қаламига мансуб бўлган “Кўнглида шукронаси бор халқнинг насибаси бутун бўлади” номли мақоладан бир-икки ихтибос келтирсам.
“Сендан ҳаракат, мендан баракат дейилганидек, фаравонлик ўз-ўзидан келмайди, албатта. Унинг замирида давлатимиз раҳбари Ислом Каримов раҳнамолигида ҳаётимизнинг барча жабҳаларида амалга оширилаётган изчил ва босқичма-босқич ислоҳотлар, халқимизнинг бунёдкорлик салоҳияти, заҳматли меҳнати, азму шижоати мужассамдир.
…Энг муҳими, халқимизнинг турмуш фаравонлигига зарар етишининг олди олинмоқда. Буни жаҳондаги, қўшни мамлакатлардаги вазият билан юртимиздаги аҳволни таққослаш орқали ҳам кўриб-билиб турибмиз. Инчунун, чет эл оммавий ахборот воситалари яқинда тарқатган хабарларда Ўзбекистонда озиқ-овқат маҳсулотларининг нархи арзонлашиб бораётгани такидланган.
…Ҳа кўнглида бугунги дориломон кунларга шукрона келтириб, эртанги кунга қатъий ишонч билан янги юксак марралар сари одимлаётган халқимизнинг насибаси ҳамиша бутун, дастурхони янада тўкин бўлаверади.”
Ушбу мақолани охирги сатрларига қадар сабр билан ўқир эканман, ҳайрат уммони остида қолдим. Чунки умрим давомида ёлғонни бу қадар ишонарли тарзда хақиқатга айлантириб ёритилган ижодий маҳсулни сира хам ўқимаган эдим. Наҳотки, Ислом Абдуғаниевич раҳнамолигида хаётимизнинг барча жабҳаларида изчил ислоҳатлар босқичма-босқич амалга оширилаётган бўлса? Ахир Каримовнинг кимлигини ва қандай ишларни амалга ошираётганини 7 ёшдан 70 ёшгача бўлган барча мамлакат фуқаролари жуда хам яхши билишади-ку! Тўғри бундан бир неча хафта илгари Ўзбекистонда озиқ-овқат нархи бир оз арзонлади. Лекин бу мамлакатнинг иқтисодий вазияти барқарор бўлганини эмас балким Ўзбекистон иқтисодиёти ўзга давлатлар иқтисодиётидан хам бир неча баробар заифлигини кўрсатади. Сабаб нарх-навонинг арзонлашиб кетиши халқаро инқирознинг Ўзбекистонга улкан тасир этиши ортидан кузатилди.
Ушбу мақола муаллифи ўзбек халқига тушунтириш бериши кераки, ким ва нега бу кунлар учун шукроналар айтиши керак. Ўзбек миллати ҚАСДДАН қириб юборилаётгани учун, Совет тузумидан қутилган бўлсада елкаси офтоб кўрмаётгани учун, халқ ўз она ватанига сиғмай қолгани учун, мамлакат мухолифатининг аксарият вакиллари қочқин бўлиб ўзга диёрларда она ватанларини соғиниб юрганлари учун ёки бу диёр аёллари ўз таналарини сотиш ортидан анчагина машҳур бўлиб кетганлари учун шукроналар айтиб шу кунларга хам қаноат қилишлари керами?
Юртимизда тасаввур қилиб бўлмадиган даражада оғир хаёт хукумронлик қилаётган бир вақтда “Кўнглида шукронаси бор халқнинг насибаси бутун бўлади”,-деб номланувчи мақола каби мантиқсиз мақолалар ёзаётган инсонларни хеч иккиланмасдан мансаб учун ватанини хам сотганлар қаторига киритишимиз мумкин.