Ўтган ҳафта бир гуруҳ ўзбек мухолифати фаоллари “Озодлик” радио раҳбариятига мактуб йўллаб, радиога бойқот эълон қилишганини билдиришган ва бунинг учун етарли важлари борлигини айтишган эди. Кеча, 22 январ куни “Озодлик” радиоси президенти Жефрей Гедмин (Jeffrey Gedmin) мактубга имзо чекканларга жавоб йўллаган.
“Бирдамлик” ҳаракати еткачиси Баҳодир Чориевнинг бизга маълум қилишича, радио президенти Жефрей Гедмин радиoга йўлланган ҳар қандай эътироз эътиборсиз қолдирилмаслигини айтган ва мактубга имзо чекканларга ўз миннатдорчилигини билдирган.
Радио раҳбари айни масалага жиддий қарашларини, лекин радиодаги ижобий ўзгаришлардан кўз юммаслик кераклигини ҳам маълум қилган. У ўз мактубида ўзбек бўлими қийин шароитларда ишлаётганини ва янги интернет саҳифаси очилганини ҳамда у ерда турли баҳсларга ўрин берилаётганини ҳам таъкидлаган.
Маълум бўлишича, “Озодлик” радиоси президенти Жефрей Гедмин (Jeffrey Gedmin) феврал ойида Вашингтонга келади ва баёнотга имзо қўйган кишилар билан учрашади.
-Биз кейинги ойда Вашингтонда буладиган учрашувда “Озодлик” радиосининг ўзбек бўлими раҳбари Сожида Жаъфаровани ишдан олишни ва унинг ўрнига ўзбек тилини яхши биладиган, журналистикадан хабари бор, холис кишини қўйишларини талаб қиламиз. Радио ишини тубдан ислоҳ қилиш, эшиттиришлар сифатини ошириш, тўрт соатлик эфир вақтидан унумли фойдаланиш, мухбирлар савияси каби бошқа масалаларни биринчи талабимиз амалга оширилгандан кейин кўтармоқчимиз. Мақсадимиз – “Озодлик” радиоси бир гуруҳ шахслар манфаатига эмас, балки ўзбек халқига хизмат қилсин,-дейди Б.Чориев.
Чориевнинг айтишича, агар бу талаблар эътиборсиз қолдирилса, мухолифат фаоллари ва демократик кучлар узлуксиз намойишлар ва пикетлар утказиш каби сиёсий тадбирларни амалга оширади.