Олимларнинг айтишларича, кишиларнинг молиявий соҳада қанчалик омадли эканликларини уларнинг бармоқлари ҳажмига қараб башорат қилиш мумкин.
Кембриж университетидан бўлган тадқиқотчилар Лондоннинг Ситисида ишловчи тужжорлар орасида ён бармоғи кўрсаткич бармоғига қараганда узунроқ бўлганлари кўпроқ пул ишлашларини аниқлашган.
Катта миқдордаги тестостерон моддаси кишиларнинг ўта ҳаяжонга тушишлари ва бунинг ортидан тезроқ бир қарорга келишлари сабаб бўлиши олимларга бундан анча аввал аён эди.
Кўрсаткич ва ён бармоқ узунлиги ўртасидаги фарқ инсонларнинг спортда қанчалик омадли эканликларини белгилаши ҳақида фикрлар ҳам узоқ вақтдан буён айтиб юриларди.
Британия Миллий Академияси мутахассисларига кўра, онанинг қорнида шаклланувчи бармоқлар, ўз навбатида, ҳомиланинг ривожланиш жараёнида бачадонда бўлган тестостерон миқдорига боғлиқ бўлади.
Кучли ҳис-ҳаяжондан эҳтиёт бўлинг
Тадқиқотчи Жон Коутс ўтган йили ўзи олиб борган илмий изланишлари ортидан катта миқдордаги тестостерон моддаси молиявий соҳада фақат қисқа муддатга қўл келиши мумкинлигини эълон қилганди.
У бошчилик қилган олимлар гуруҳи эрта тонгда қонларида тестостерон моддаси кўп бўлган тужжорларнинг бошқаларига қараганда камроқ даромад келтиришларини аниқлашганди.
Бир ярим йилдан ортиқроқ вақт давомида олиб борилган тадқиқотлар натижасида ён бармоғи кўрсаткич бармоғига қараганда узунроқ бўлган тужжорлар ён бармоғи кўрсаткич бармоғига қараганда калтароқ бўлганларидан 11 баравар кўп пул ишлашган.
Олимларга кўра, мазкур «биологик омил» тужжорларнинг молиявий соҳадаги тажрибалари каби катта таъсирга эгадир. Яъни, тажрибали тужжорлар янги ишга келганларига қараганда 9 марта кўпроқ даромад келтиришади.
Лекин шунда ҳам ўта тажрибали тужжорлар орасида номсиз бармоғи узун бўлганлари ҳар йили бошқаларига қараганда кўпроқ пул ишлашлари маълум бўлган.
Биология ва пул
Бельгиялик олимлар олиб борган тадқиқот натижаларига кўра эса, номсиз бармоғи узунроқ бўлган эркаклар калтароқларига қараганда хасисроқ бўлишади.
Ва аксинча, кўрсаткич бармоғи узунроқ бўлганларининг қўллари анча очиқ ҳам бўлиб чиққан.
Тадқиқотчи Кобе Миллетнинг айтишича, бунга ўхшаш биологик омиллар ҳақиқатда ҳам кишиларнинг хулқ-атворларига таъсир қилади.
Олимга кўра, «Қўлга киритилган натижалар тестостероннинг ҳомилага таъсир даражаси бутун умрлари давомида инсонларнинг хулқ-атворларига катта таъсирга эга бўлишини англатади.»