Зоҳир Шоҳ
Бойсун туманинг “Газа” маҳалласида Саломат Мирсаидова исмли фуқаро аёл истиқомат қилади. У аёл киши бўлсада аксарият эркаклардан кўра шижоатлироқ. Уни амалга ошираётган ишларини, қурдирган иморатларини кўрсангиз хайрон қоласиз. Саломатнинг ишларини “мана-мен” деган йигитлар ҳам қилолмайди, -дейишади шу маҳаллада истиқомат қилаётган нуроний инсонлар.
Кўринишидан ўта ҳам маккор, жуда чаққон, сўзга чечан ва ҳар кимни ҳам писанд қилавермайдиган аёл эканлиги билиниб турган Саломат Мирсаидова 50 ёшни қаршилаган бўлсада ҳеч ким уни 35 ёшдан ошган деб ўйламайди.
Мирсаидовани Бойсун туманида бир неча шахсий дўконлари, ошхона ва магазинлари бор. Доимо иш билан банд бўлувчи аёл “Нексия” русумидаги автомашинасини ўзи бошқариб юради. Унинг турмуш ўртоғи Мухриддин исмли ака. Саломат опадан кимдир:
-Хўжайнингиз борми?, -деб сўраб қолгудек бўлса у:
-Ҳа, номигагина, -деб жавоб беради.
Халқ орасида эса Саломат Мирсаидовани аллақандайдир мафияга аъзо эканлиги ҳақида гап сўзлар юради. Мен бунга негадир ишонгим келмади ва Мирсаидовага яқин бўлган инсонлардан бири билан суҳбатлашдим.
-Саломатнинг “Инкабод” қишлоғида ҳам ошхонаси бор. Бу ошхона аслида номигагина ошхона. Аслида эса ниқоб сифатида ташкиллаштирилган жой. Денов-Бойсун катта трассасида жойлашган ушбу емакхонанинг орқа томонида ароқ цехи бор. Бу ерда тайёрланаёган ароқларни тайёрлаш учун ишлатиладиган деталлар “Дейнов туман ароқ заводи”дан олиб келинади. Ошхона шу цехни кўздан пана қилиш мақсадида очилган. Бу ошхонада ҳар куни тундан тонгга қадар айиш-у ишрат бўлади. Бу ерга қадам ранжида қилган ҳурматли “катталарга” туманинг энг сара ва ёш қизларини олиб келиб тортиқ қилишади. Ўз номуси бузилаган қизларнинг аксарияти ўз уйига қайтолмаслиги сабаб шу ошхонада қолиб фоҳишалик қилишади ва келган “катталар”нинг кўнглини овлаш билан бирга шу ерда тайёрланаётган қўлбола ароқларни сотишади, -дейди Саломат Мирсаидовани яқиндан таниган ва ўз исмини ошкор этилишини истамаган шахс.
Бундан бир неча ой муқаддам Саломат Қашқадарё вилояти ҳудудидаги “Чак-чак” ЙПХ масканида 10 килограмм қора дори билан қўлга тушди ва қамалиб кетиши мумкинлигини ҳис этиб, ЙПХ ходимларига 10 минг “кўк”идан бериб қилмишини ими-жимида тинчитди.
Унинг бу ишларини эшитиб ва гувоҳи бўлиб ўйланиб қоламан. Ёш қизларнинг номусини бузиб ҳеч қандай жазо олмай юрган Саломат ҳақиқатдан ҳам қандайдир жиноий гуруҳ –мафияга аъзомикан?