Барак Обама – Америка Қўшма Штатларининг 44-президенти
Овозларнинг қарийб 52% ни олган демократ номзод 47% сайловчи танловига мушарраф бўлган республикачи рақиби Жон Маккейнни ортда қолдирган.
Айни дамда ўтган сафар республикачи номзодни сайлаган Оҳайо ва Флорида каби муҳим штатлар Барак Обама учун овоз беришди.
Шу асно жаноб Обама ўзи учун керакли 270 сайлов йиғини овозини илк сарҳисоблардаёқ қўлга киритган.
Бу сафарги сайловда мамлакат тарихида шу пайтгача кутилмаган даражада кўп сонда – 110 миллион америкалик овоз берган.
Илк ғалабаси ортидан гапираркан, Барак Обама Америкага ўзгаришлар келганини қайд этди.
Миллионлаб демократпарастлар, қора танли ва испанзабон америкаликлар кўчаларда туни бўйи шод-хуррамлик қилишаркан, янги сайланган президент ўзини қўллагани ё қўлламаганидан қатъи назар барча америкаликлар учун бирдек хизмат қилишини айтди.
Ўз мағлубиятини тан олган Жон Маккейн эса Барак Обама миллионлаб қора танли америкаликлар учун янги давр эшигини очганини, Америка барчага бирдек имконият яратишга қодир юрт эканлигини исботлаганини урғулади.
Айни дамда муддати тугаётган президент Жорж Буш ҳам Барак Обамага қўнғироқ қилиб, табриклаган.
Хитой президенти Ҳу Жинтао ўз табригини йўлларкан, бу ғалаба дунёнинг икки муҳим мамлакати ўртасидаги муносабатларнинг яхшиланишига йўл очишини қайд этган.
Оврўпо раҳбарлари, Мексика ва Япониядан ҳам аллақачон табриклар келган.
Барак Обаманинг отаси туғилиб ўсган Африкадаги Кенияда эса дам олиш куни эълон қилинган.
Кузатувчиларга кўра, Жорж Буш сиёсатидан норозилик ва кўплаб инсонлар ҳаётига таъсир этган иқтисодий инқироз сайловчиларни Жон Маккейндан юз ўгиришга ундаган бўлиши мумкин.
Шу асно, Барак Обаманинг қора танли эканлиги унинг сайланишида аслида неқадар аҳамият тутиб, тутмагани хусусида фикрлар якдил эмас.
BBCUzbek.com