Каримовнинг сеҳрли қучоғи

Кечирасиз, бу менинг “тентакона” деган қилиқларини бироз ташхез қилсангиз, уларнинг ҳар бири ортида тентакларча гапираётган аҳмоқнинг ўзи йўқ, аксинча, ўзини гўё халқпарвар, софдил ва содда бир инсон қилиб кўрсатаётган айёр ва суҳбатдошларини сувга олиб бориб суғормай келадиган кишини кўриш мумкин.

Масалан, “Мустақиллик” ва “Наврўз” тантаналарида кўп баландпарвоз ниятлар айтган Каримов ўзининг қуруқ сўзларидан ўзи уялмай деб, соддалик билан ўзини ортиқча шод ва хурсандликка олади.

У бугун гўё бахтиёр ва ўз ҳаяжонларини изхор этиш учун бирор санъаткорними ёки спортдаги жаҳон чемпиони, жуда бўлмаса ўз қўғирчоқларидан Абдулла Ориповними бағрига босмоқчи бўлиб бу катта даврани телевизордангина кузатаётган 20 миллиондан ортиқ камбағал халққа,гўё ўзини бу ерда оддий халқнинг орасида юргандай ва улар билан ҳам нафасдай қилиб кўрсатади.

Аммо чеҳраларидан табассум ёғиб ўтирган ва қўллари қарсаклардан бўшамаётган ва чиндан Каримовнинг ташлаб қўйган халқини талаб, фаровонликда шоҳона яшаётган бу беш-ўн мингча бош келадиган амалдор ва казо-казоларнинг оила ва болалари олдида Каримов қўриқчисиз керилиб юраркан, даврани айланиб, кўпларни қучоқлайди.

Билсангиз унинг бундай “бахтли” қучоқларига халқ зор эмас, аксинча ўзбек халқининг кўзича Каримовнинг шунчалар кўп қилаётган найрангларидан кўра, оч халққа Каримовни қучоқлагандан кўра бир қоп унни қучоқлагани маъқул эмасмиди дейсиз.

Каримов томонидан гўё севиб ардоқлаб қучоқлаган буюк кишилар ва унинг кўп яқин дўстлари, негадир узоққа бормай бирин-кетин Ўзбекистонни бугун бўлмаса, эртага тарк этмоқдалар, гўё уларнинг бошига ҳам, Чингиз Айтматов ёзгандай, Чингизхон зулмидан манқуртларга айланганларнинг чексиз хўрланган кунлари келгандай.

Буларга мисол қилиб кичик бир рўйхатни эслатиб ўтишнинг ўзи кифояки, бундай Каримов қучоқлаган кишиларнинг юзлаб ва миллионлаб долларли бадавлат бўлганинг билан барибир улар доимий хавотирда яшаб, уларга Ўзбекистонда керакли руҳий тетиклик ва осойишталик кафолатларининг етишмаслиги асосий сабаб бўлган.

Бундай рўйхатнинг бошини агар, шахмат бўйича жахон чемпиони ва ҳали ёш бўлишига қарамасдан юртимизнинг фахрига айланган Рустам Қосимжоновдан бошласак, унинг олтин бошидаги етук иқтидори аввал тан олиниб, унга шахматдаги билимини мустаҳкамлаш учун компютер бериб ғамхўрлик қилинди.

Лекин Рустам Қосимжонов жаҳон чемпиони бўлгач, Каримов уни қучоқлаб мана ёшларимизнинг нимага қодирлиги ва уларни эртага қандай буюк келажак кутаётганини кўролмайдиганлар кўриб қўйсинлар қабилидаги шов-шув кўтардию, тез орада Рустамжон Каримовга бошқалардай дарз кетган пиёладай керак бўлмай қолди.

Ваҳоланки, бу ёш иқтидор эгаси келгусида миллатимиз ёшларига ўзининг шахмат олами сирларини ўргатишда катта мактаб очиб, бу билан ҳали унинг ўзи ҳам бунданда юқори кўп натижаларга эришиши мумкин эди.

Ўз вазнида бокс бўйича жаҳон чемпиони Артур Григорянга ҳам чемпион бўлгунча унга ўзбекча: “Мен албатта Ўзбекистон байроғини баланд кўтараман” деган гапни телевизорда унга йигирма марта такрорлатиб унинг жонига тегишган бўлса керак, у ҳам Каримов қучоғидан чиққач Ўзбекистон байроғини унутиб, хозир у жон деб Германияда яшамоқда.

Артурга энг ёқадиган жойи, бу ерда Германия байроғини баланд кўтараман дейсан, Германия мадҳияси янграганда албатта ўнг қўлингни чап кўкрагингдаги юрагинг устига қўйиб туришинг керак, деб хеч кимнинг унга айтмаётгани бўлса ажаб эмас, чунки Германияда диктатура йўқ, у ерда демократия мавжуд бўлиб, ҳамма озод ва эркин яшайди.

Умуман Ўзбекистонда халққа мутлақо фойдаси тегмаётган турли жамғарма ва жамиятларни рўкач қилиниб, чемпионларидан улар олган соврин ва мукофотлари ҳисобидан масалан мактаб ва турли интернат қуриш учун, маҳаллий хукумат ҳисобларига аҳолининг газ, электр ва сув харажатларини тўлаб юбориш учун ҳам маблағ ўтказиш каби савобли ишлар учун таклифларнинг кўпайиб кетгани ҳам чемпионларимизнинг ғашларига тегиб улгурган.

Яқинда оғир вазндаги профессионал бокс бўйича жаҳон чемпиони Руслан Чагаевнинг жасорати билан жаҳонга довруғи кетган бу жаҳон чемпиони ҳам Каримовнинг қучоғидан отилиб чиққанча Ўзбекистондан қариндош уруғларини йиғиштириб, бирор демократик мамлакатга эркин нафас олиб яшаш учун, Ўзбекистонни тарк этади.

Спортни ривожлантиришда гаплар кўп, лекин муаммолар унданда кўп, Ўзбекистондан бўлажак чемпионлар учун эьтиборнинг мутлақо йўқлигидан ўнлаб кучли спортчиларимиз ўзга юртларда санғиб юришибди.
Уларнинг орасида бир неча жаҳон чемпионлари ҳам бу ердаги шароит ва таниш билишликдан аразлаб бошқа юртларга бориб жаҳоннинг юксак спорт супачаларига чиқиб, олтин медал соврундорлари бўлмоқдалар.

Масалан Ўзбекистондан чиқиб кетган жаҳон чемпионларидан Лариса Чусавитина Германияга бориб, Пекин олимпиадасидан Германияга олтин медал келтиргани, шунингдек Қатардаги Осиё мамлакатлари мусобақасида бокс бўйича олтин медал соҳиби Бахтиёр Сарсакбоевнинг Ўзбекистон составидан Пекин олимпиадасига қўйилмагани учун, унинг Қозоғистонга бориб, у ердан Пекин олимпиадасидан бу ўзбекистонлик йигитнинг Қозоғистонга олтин медал олиб берганига нима дейиш керак?

Бундан ташқари Каримовнинг бир неча бор қучоқларидан “баҳраманд” бўлган ва халқимизнинг севиб ардоқлаган буюк фарзандларидан Шерали Жўраев ва алоҳида иқтидор эгаси Юлдуз Усмоноваларнинг тақдири нима кечди?

Нега улар марказий радио ва телевидениядан четлаштирилдилар, ахир уларни неча ва неча бор юксак санъатларини тақдирлаб Каримов қучоқлаганини ҳаммамиз кўрган эдикку, айтинг, уларни хафа қилишга ёки халққа қарата ўқ узишдек даҳшатли буйруқларни беришга Каримовдан бошқа ким ҳам журъат этаолар эди, дейсиз?!

Биз бу бирнеча дақиқали суҳбатимизда Ўзбекистондаги атиги спорт соҳасидаги Каримовнинг қилаётган “ўйин натижалари” тўғрисида гаплашдик ва аслида эса, бу ўйинлар унинг нафақат спорт, республиканинг ҳамма соҳалари бўйича ҳам иқтидорли ва ташаббускор кадрларимизни аста-секин кўз илғамас учинчи ноактив йўлларни усталик билан ишга солиб, Ўзбекистондан “сиқиб чиқариш”га эришмоқда

Шундай экан яна савол туғилади: Бизлар Каримовнинг битта ғилдираги қолган шалдироқ аравасида судралиб 17 йил ўтибдики, бошқалардек беш довон эмас, ҳали ҳам бир довон оша олмаганимиз энди кўпчиликка аён бўлиб қолди,
Бу кетишда кўп ёруғ ва зимистонларни кўрган биз қариялар ўтганимиздан сўнг орқамиздаги авлодлар қандай кун кечирар эканлар, Ўзбекистонда кимлар ва қандай кишилар қолар эканлар деб ўйлашга мажбурмиз?