 |
|---|
Давлат телевидениеси учрашув чоғида жаноб Каримовнинг Ричард Норландга айтган сўзларини келтирган.
«АҚШнинг Ўзбекистондаги элчиси сифатида сиз Ўзбекистондаги вазият ҳақида аниқ ва холис ахборот тўплаш имконига эга бўлдингиз», деб айтган Президент.
У АҚШ, хусусан, Давлат Департаментининг Ўзбекистондаги вазиятга берган баҳоси «ҳар доим ҳам объектив эмас» лигини таъкидлаган.
Давлат Котибининг ўринбосари Ричард Боучернинг Ўзбекистонга сўнгги ташрифини хотирлатган жаноб Каримов АҚШ элчисига ўзаро муносабатларда «нималар бўлиб ўтгани ёки бўлаётгани эмас», балки келажакда қандай ҳамкорлик қилиш мумкинлигини муҳокама этишни таклиф этган.
Жаноб Каримовнинг сўзларига кўра, у Ричард Боучер билан «жуда ҳам жиддий масалалар»ни муҳокама қилган.
Президентнинг аниқлик киритишича, сўз «ҳамкорлик қилиш мумкин бўлган асосий соҳалар» ҳақида кетмоқда.
‘Ўтган ишга саловот’ми?
Ўзбекистон раҳбарининг АҚШ элчиси билан сўнгги учрашуви икки ўртада Андижон воқеаларидан сўнг совуқлашиб кетган муносабатлар илиқлаша бошлаган пайтга тўғри келган.
АҚШнинг Андижонда юзлаб намойишчиларнинг ўлдирилиши юзасидан халқаро тергов ўтказиш чақириқларига жавобан жаноб Каримов Америка кучларини мамлакатдан чиқариб юборганди.
Бунинг ортидан Ўзбекистон Россия ва Хитой билан алоқаларни кучайтирди.
Жаноб Каримов мамлакатнинг МДҲ ва Шанхай Ҳамкорлик ташкилоти таркибидаги бир қатор тузилмаларга қўшилиши ҳақидаги битимларни имзолади.
Жумладан, Ўзбекистон Коллектив Хавфсизлик Шартномасидаги иштирокини қайта тиклашини эълон қилди.
Аммо ўтган йил охирида Президент Каримов ғарблик дипломатлар қаршисида қилган нутқида АҚШ билан ўртада келишмовчиликлар йўқлигини айтиб, ғарб билан алоқаларни қайта тиклаш ниятида эканига ишора қилди.
Бунинг ортидан аввалига АҚШ Марказий кучлари қўмондони, кейин эса АҚШ Давлат Котиби ўринбосарларининг Ўзбекистонга ташрифи кузатилди.
Апрел ойида Бухарестдаги НАТО саммитида иштирок этган жаноб Каримов НАТОнинг инсонпарварлик юклари учун Афғонистонга Ўзбекистон ҳудудидан йўлак очиб беришга тайёр эканини эълон қилди.
Баъзи кузатувчилар жаноб Каримовнинг сўнгги қадамларини АҚШдаги келаётган президентлик сайловлари билан ҳам боғлашади.
Таҳлилчиларга кўра, Ўзбекистон раҳбари ноябр ойида сайланадиган янги президент билан муносабатларни янгидан бошлашга умид қилаётган бўлиши мумкин.
Аммо уларга кўра, бу осон бўлмайди.
Президентликка номзодлардан бири – республикачи сенатор Жон Маккейн АҚШ Конгрессида Андижон воқеалари учун масъулларни жавобгарликка тортишга доир қонун лойиҳасини илгари сурган.
Аммо иккинчи томондан, демократлар номзоди Барак Обаманинг Афғонистонга кўпроқ эътибор қаратаётгани, унга қўшни давлатлар, жумладан Ўзбекистоннинг аҳамиятини ошириши мумкин.
Ўзбек ва Америка мулозимлари қайта бошланган мулоқотларда Хонобод ҳарбий базасидан фойдаланиш масаласи кун тартибида эмаслигини айтишади.
Аммо Ўзбекистон ҳозирнинг ўзида АҚШ аскарларининг НАТО учоқлари воситасида Термездаги олмон ҳарбий базаси орқали Афғонистонга ўтишига рухсат бергани ва жаноб Каримовнинг яқинроқ ҳамкорлик қилиш истагида экани инобатга олинса, кузатувчилар ҳарбий алоқаларнинг аввалги даражага кўтарилиши эҳтимолини истисно этмайдилар.