Саъжлар
Дилором
Инсоният туташади битта илдизга. Тарқаган ягона Одам Атодан ва сўнгралари миллат, элатларга (рости, иллатларга) бўлиниб кетган.
Сизни билмадим-у, шу гапларга ишонаман ман.
Бу халқ, бу махлуқот вақти-вақти билан жангу жадаллар, буюк юришлар қилиб туради. Буюк юришларнинг, жангу жадалларнинг натижаси доим бир хил бўлади. Азал бир асосдан тарқаган қавмлар, турли миллатлар бирлашади қайта. Фақат бу эски кашфиётни кўрманг хар ерда айта. Оқибати ёмон бўлади: бундан мустабидликнинг хиди келади.
Масалан, Чингизхон-мўғулга дўндирган ярим дунёни, Боязид-турклик шарафи билан тўлдирган.
Искандар лашкари юнон-греклар ададини оширган, шаксиз. Ахир мумкин эмас бусиз.
Ёинки араблар аскари мовий кўз, сиймтан гўзалларга хадя этган тим қора кўзли қоп-қора келажак. Табиий, ахир улар Эркак. Демак, бу демак…
Энди айтинг, менинг, сизнинг, бизнинг миллатимиз нима? Қавмимиз қайси? Аслимиз қаердан, наслимиз қайси?
Бу хақиқатни чуқур англаган сайин миллатчилик хисси билан ёнаман. Инсониятман аввали, Башардирман азали, биламан.
Зинхор инкор эта кўрманг, шубха хам қилманг,
айни пайт мен Ўзбек бўламан.
Яна бир гап.
Искандар Македониялик бўлгани учун Македонский номини олганлиги рост.
Ё Имом Бухорий замон сахифасига кетаркан ўз исмини ёзиб,
солди Бухорога янгидан асос.
Мен эса ўзбекман Ўзбекистонлик.
Қани айтинг, қандай эътирозингиз бор менинг аслимга, келиб чиқишимга, миллатимга, наслимга?
Дунёга тенгман.
Азали Башардан мутлақ Ўзбекман.
02.10.05.